1 Wekker ōstfräisk flâğ is däi ‘räecht’ flâğ?
Däi ōstfräisk dreiklööer is swārt-rōd-blāu. Wōsō? Süü 2.
2 Is däi ōstfräisk flâğ ‘n offisjäel flâğ?
Up ‘t landskupsfergóódern (fan d’ Ōstfräisk Landskup) fan d’ desembermóónd 1956 wur ‘n flāgen-pāregróóf föör ‘t ferfóóten fan d’ Ōstfräisk Landskup annōmen, däi d’ ōstfräisk klöören as offisjäel flâğ föör d’ Ōstfräisk Landskup fastläegen dē. Dit bīstemmen wur 1957 fan ‘t landsrēgææren in Hōnöywer bīfasterğt (NLA AU Dep. 1 N Nr. 3476), sō dat sīt däi tīd ōk amten däi ōstfräisk flâğ bī offisjäel anlóóten hīsen köönent. Däi flâğ höört sītdēm ōk âl ōstfräisk kumūnen (landkringen, mäinten usf.).
3 Dürent kumūnen däi flâğ mit ‘t wóópen (mit däi hōvdlingsslağten) hīsen?
Dat wóópen is wal oller as däi ōstfräisk flâğ un däi ōstfräisk flāgen mit ‘t wóópen wordent ōk mēr ferköft as däi flāgen sünner wóópen, man spītelkerwîs het disser flâğ ğīn offisjäel stóótes. Dat gift ōk mäinten, däi d’ ōstfräisk dreiklööer mit ‘t mäintwóópen hīsen daunt. Disser flāgen köönent ‘n offisjäel stóótes hebben, dō däi mäinten höör as höör klöören annōmen hebbent.
4 Sğrift dat lēğsaksk wóópenwet allenerğ däi lands-, bunds- un oirōpēsk flâğ fööer?
Nē, dājt ‘t näit. Dat lēğsaksk wóópenwet sğrift fööer, wō d’ landsflâğ un ‘t landswóópen stalt’t wēsen söölent. In däi ūtföörensbīstemmens föör ‘t lēğsaksk wóópenwet find’t me unner 1.4: “Däi unner d’ uppās fan ‘t land stóónd gewestkurs (dt. Gebietskörperschaften) […] fan ‘t ōpenbor recht word’t anbīfōlen, up däi fastläeğt dóóeğ höör amtsstēden ōk t’ bīflāgen.” Kumūnen dürent düs binnen ‘t wet sülst ōwer höör bīflāgen bīsğikken, me dājt höör blōt undfēlen, sük an däi bīflāgensdóóeğ t’ hollen.
5 Sğrift däi bundsflāgenbīslūt allenerğ däi lands-, bunds- un oirōpēsk flâğ fööer?
Däi bundsflāgenbīslūt dājt sük blōt up róódhūsen, däi äigendaum fan d’ bund bünt, bīlūken. Róódhūsen in ‘t äigendaum fan d’ kumûn dājt h’ näit róóken.
6 Wel dājt ōwer ‘t bīflāgen bīslūten?
Däi kumûn -> süü fróóeğ 4.
7 Wōsō hebbent (Ōst)Fräisen ‘t recht up ‘t bīflāgen?
Däi Fräisen bünt äin fan däi fær stóótelk un oirōpēsk ankent nóósjenóóel minnerhaiden in Düütskland. Däi anner minnerhaiden bünt Dānsken, Sōrbsken un Sinten & Rōmós.
Däi róómkuntrakt tau ‘t bīsğīrmen fan nóósjenóóel minnerhaiden kwam in d’ Bundsrēpublik Düütskland up d’ 01.02.1998 in wārk. Al in ‘t ‘föörsğrīvsel’ kan me lēsen, dat ‘n dēmōkróótsk selskup pāsend kundīsjes sğeppen sul, däi “… däi äigen īdentitäit [fan däi minnerhaiden] antöönen …” (rēsp. woren/fērerundwikkeln) daunt.
8 Word’t däi ōstfräisk flâğ al hīst?
In däi mäient Īel hangt al ‘n Ōstfräislandflâğ fööer ‘t róódhūs. In wat anner mäinten diskutæært me in d’ mäintróód no ōwer d’ ōstfräisk flâğ.
