Leerent däi Maurmerlandjer poolitikkers fan disser fail

Däi Oostfräisland-Flâağ, wel kent hum näit? Däi flâağ, mit of sünner wóópen, süğt me in ‘n büelt tuunen. Däi Oostfräisk Landskup het sülst ‘n äigen wersje mit höör Landskupswóópen, up däi in d’ middent däi Upstalsboom ofbild’t is. Däi histoorje fan ‘t Gróófenwóópen un fan ‘t Landskupswóópen gaajt weeruem nóó ‘t 17. äiw. Däi klöören swaart-rood-blaau kooment amäen fan ‘t 19. äiw. Däi oostfräisk flâağ höört unnerwiilst net soo tau Oostfräisland as booseln, däi Noordsäj un däi oostfräisk tóól.

1957 wur däi oostfräisk dreiklööer swaart-rood-blaau fan ‘t landsreegäären biifasterğt (NLA AU Dep. 1 N Nr. 3476), soo dat siitdeem ook amten däi oostfräisk flâağ bii offisjäel baudels hiisen köönent. Däi oostfräisk flâağ is düs ğiin feräinsflâağ, man ‘n offisjäel flâağ.

1998 róótiifiisäärde ‘t bundsreegäären däi róómkuntrakt tau ‘t biiskiirmen fan nóósjenóóel minnerhaiden. Siit däi tiid bünt däi Fräisen, Daansken, Soorbsken, un Sinten/Roomós fan ‘t bundsreegäären as ‘n nóósjenóóel minnerhaid ankent. Us is näit biikent, dat artikkel 5 fan d’ róómkuntrakt fan d’ Maurmerlandjer kultürkummisje biiacht’t wur. Äien maut in disser kuntekst fróógen, woo fööl küen däi poolitikkers d’r fan haarent. Wii dürent as börgers do ferwachten un ferlangen, dat s’ us wetten kennent?

Rahmenübereinkommen, Art. 5, Abs. 1: Die Vertragsparteien verpflichten sich, die Bedingungen zu fördern, die es Angehörigen nationaler Minderheiten ermöglichen, ihre Kultur zu pflegen und weiterzuentwickeln und die wesentlichen Bestandteile ihrer Identität, nämlich ihre Religion, ihre Sprache, ihre Traditionen und ihr kulturelles Erbe, zu bewahren.

(Róómkuntrakt, artikkel 5, ofset 1: Däi kuntraktspertäjen ferfliitent sük, däi kundiisjes tau biiföördern, däi ‘t leeden fan ‘n nóósjenóóel minnerhaid möögelk móókent, höör kultüer tau pleegen un feerer tau undwikkeln un däi biilangrîik paarten fan höör iidentitäit, nóómelk höör gelôov, höör tóól, höör drağten un höör kultüräel aarvdaum, tau woren.)

Andochterğ däi histoorje, ‘t offisjäel ankennen un ‘t dóódelk ferwenden, kan me däi flâağ sünner twiivel as ‘n pâart fan d’ oostfräisk iidentitäit indäilen. Um disser fail t’ biirechterğen, hebbent wii ‘n Oostfräisland-Flâağ fööer ‘t Maurmerlandjer róódhuus uphangen. Wii köönent man hoopen, dat disser geneegen poolitikkers döör däi an ‘t oowerweegen brocht wordent un fan höör fail leeren köönent. Un däi flâağ? Däi dürt däi mäient föör d’ tauken geleegenhaid hollen.