1 Wekker oostfräisk flâağ is däi ‘räecht’ flâağ?

Däi oostfräisk dreiklööer is swaart-rood-blaau. Woosoo? Süü 2.

2 Is däi oostfräisk flâağ ‘n offisjäel flâağ?

Up ‘t landskupsfergóódern (fan d’ Oostfräisk Landskup) fan d’ desembermóónd 1956 wur ‘n flaagen-paaregróóf föör ‘t ferfóóten fan d’ Oostfräisk Landskup annoomen, däi d’ oostfräisk klöören as offisjäel flâağ föör d’ Oostfräisk Landskup fastläegen dee. Dit biistemmen wur 1957 fan ‘t landsreegäären in Hoonöywer biifasterğt (NLA AU Dep. 1 N Nr. 3476), soo dat siit däi tiid ook amten däi oostfräisk flâağ bii offisjäel anlóóten hiisen köönent. Däi flâağ höört siitdeem ook âal oostfräisk kumuunen (landkringen, mäinten usf.).

3 Dürent kumuunen däi flâağ mit ‘t wóópen (mit däi hoovdlingsslağten) hiisen?

Dat wóópen is wal oller as däi oostfräisk flâağ un däi oostfräisk flaagen mit ‘t wóópen wordent ook meer ferköft as däi flaagen sünner wóópen, man spiitelkerwîis het disser flâağ ğiin offisjäel stóótes. Dat gift ook mäinten, däi d’ oostfräisk dreiklööer mit ‘t mäintwóópen hiisen daunt. Disser flaagen köönent ‘n offisjäel stóótes hebben, doo däi mäinten höör as höör klöören annoomen hebbent.

4 Skrift dat leeğsaksk wóópenwet allenerğ däi lands-, bunds- un oiroopeesk flâağ fööer?

Nee, daajt ‘t näit. Dat leeğsaksk wóópenwet skrift fööer, woo d’ landsflâağ un ‘t landswóópen stalt’t weesen söölent. In däi uutföörensbiistemmens föör ‘t leeğsaksk wóópenwet find’t me unner 1.4: “Däi unner d’ uppaas fan ‘t land stóónd gewestkurs (dt. Gebietskörperschaften) […] fan ‘t oopenbor recht word’t anbiifoolen, up däi fastläeğt dóóeğ höör amtssteeden ook t’ biiflaagen.” Kumuunen dürent düs binnen ‘t wet sülst oover höör biiflaagen biiskikken, me daajt höör bloot undfeelen, sük an däi biiflaagensdóóeğ t’ hollen.

5 Skrift däi bundsflaagenbiisluut allenerğ däi lands-, bunds- un oiroopeesk flâağ fööer?

Däi bundsflaagenbiisluut daajt sük bloot up róódhuusen, däi äigendaum fan d’ bund bünt, biiluuken. Róódhuusen in ‘t äigendaum fan d’ kumûun daajt h’ näit róóken.

6 Wel daajt oover ‘t biiflaagen biisluuten?

Däi kumûun -> süü fróóeğ 4.

7 Woosoo hebbent (Oost)Fräisen ‘t recht up ‘t biiflaagen?

Däi Fräisen bünt äin fan däi fär stóótelk un oiroopeesk ankent nóósjenóóel minnerhaiden in Düütskland. Däi anner minnerhaiden bünt Daansken, Soorbsken un Sinten & Roomós. Däi róómkuntrakt tau ‘t biiskiirmen fan nóósjenóóel minnerhaiden kwam in d’ Bundsreepublik Düütskland up d’ 01.02.1998 in waark. Al in ‘t ‘föörskriivsel’ kan me leesen, dat ‘n deemookróótsk selskup paasend kundiisjes skeppen sul, däi “… däi äigen iidentitäit [fan däi minnerhaiden] antöönen …” (reesp. woren/feererundwikkeln) daunt.

8 Word’t däi oostfräisk flâağ al hiist?

In däi mäient Iiel hangt al ‘n Oostfräislandflâağ fööer ‘t róódhuus. In wat anner mäinten diskutäärt me in d’ mäintróód no oover d’ oostfräisk flâağ.